Rama prezanton projektin për Urën e Madhe të Kukësit: Një tjetër vepër e munguar e Rrugës së Kombit

Kryeministri Edi Rama përmes një postimi në faqen e vet në Facebook ka prezantuar projektin për Urën e Madhe të Kukësit, e cila sipas tij është një tjetër vepër e munguar të Rrugës së Kombit, falë së cilës do të mbyllet “kapitulli i kthesës sa të rrezikshme aq edhe qesharake në dalje të asaj ‘gryke shisheje’ përballë shkëmbit”.

Përmes fotove të postuara në profilin e vet në rrjetin social kreu i qeverisë jep edhe detaje të projektit të ri, duke mos harruar të thumbojë edhe opozitën.

“Ura do të jetë e varur në 310 m gjatësi dhe struktura e saj mbajtëse kryesore, do të jetë një element mbresëlënës prej çeliku special, me hapësirë 270m dhe lartësi 50m.

Aktualisht janë kryer gërmimet për ndërtimin e ballëve të urës nga të dy krahët, duke zhvendosur rreth 270 mijë m3 shkëmb. Puna për ndërtimin e rampës, montimin dhe lëshimin e harkut të urës si edhe të elementeve të tjerë të saj, nis në shtator”, shkruan kreu i qeverisë.