BE sanksione ndaj 14 politikanëve bjellorusë, zhduket drejtuesja e opozitës

Një nga krerët e opozitës bjelloruse, Maria Kolesnikova, është raportuar e zhdukur që nga ora 10:00 e ditës së sotme. Dëshmitarë okularë kanë thënë se ajo është marrë me forcë nga njerëz të paidentifikuar, ndërkohë që anëtarët e stafit nuk kanë arritur të krijojnë asnjë lloj kontakti.

Teksa gjendja në vend mbetet e tensionuar, Bashkimi Evropian synon të vendosë sanksione ekonomike ndaj 31 zyrtarëve bjellorusë, përfshirë ministrin e brendshëm të vendit, si përgjigje ndaj zgjedhjeve të 9 gushtit, që sipas Brukselit ishin të manipuluara.

Lajmi vjen thuajse një muaj nga nisja e protestave masive kundër rezultatit të procesit, që i dha mundësi presidentit Alexander Lukashenko të zgjasë pushtetin e tij 26-vjeçar. Në këtë mënyrë, BE synon të ndëshkojë agresionin e qeverisë ndaj protestuesve dhe të mbështesë mbajtjen e zgjedhjeve të reja.

Një diplomat i BE-së ka deklaruar për agjencinë e lajmeve “Reuters” se fillimisht Brukseli kishte rënë dakord për 14 emra zyrtarësh, por shumë shtete anëtare menduan se kjo nuk ishte e mjaftueshme.

Sipas burimit, bëhet fjalë për zyrtarë të hershëm, përgjegjës për zgjedhjet, aktet e dhunës dhe agresionin ndaj protestuesve.

Sanksionet do të hyjnë në fuqi më 22 shtator, një ditë pas takimit të ministrave të Jashtëm të BE-së, në të cilën mund të vendoset që listës t’i shtohen emra të tjerë.

Ndërkohë, presidenti bjellorus Aleksandër Lukashenko nuk është përfshirë në listë, pasi Gjermania, që kryeson presidencën e radhës të BE-së, ka zgjedhur t’i japë atij më shumë kohë për dialog me opozitën.