‘Shqiptarët po ikin’, Meta: Rama u vrau shpresën, nesër është ora e llogaridhënies

Kryetari i Partisë së Lirisë, Ilir Meta thotë se shqiptarët po ikin, pasi kryeministri Edi Rama u ka vrarë shpresën.

Përmes një postimi në rrjetet sociale, Meta, duke iu referuar një raporti ku thuhet se 53% e fuqisë punëtore në vend është në kërkim për jetë më të mirë jashtë Shqipërisë dhe se 25% e tyre janë gati të ikin brenda vitit, u shpreh se shkak për këtë është keqqeverisja.

“Një tjetër raport i besueshëm konfirmon të vërtetën e vetme, që shqiptarët po ikin sepse Edi Rama është autori dhe përgjegjësi kryesor i vrasjes së shpresës së tyre, armiku i lirive, i demokracisë dhe shtetit ligjor. Të dhënat e publikuara së fundmi nga kompania Ep & Partners Consultancy (EPPC) pohojnë se 53% e fuqisë punëtore në vend është në kërkim për jetë më të mirë jashtë Shqipërisë dhe se 25% e tyre janë gati të ikin brenda vitit.

Shkak kryesor sipas vetë të anketuarve është keqqeverisja dhe vrasja e shpresës nga “Rilindja”. Është kjo arsyeja, konfliktet dhe përjashtimet e thella sociale, që po i detyrojnë shqiptarët të rrezikojnë edhe jetën e tyre duke kaluar La Manshin me gomone dhe aspak propaganda e gënjeshtërt e Edi Ramës se shqiptarët po ikin sepse sipas tij kjo ju pëlqen. Ndaj nesër zëri i zemërimit mbarëpopullor do të buçasë në sheshet e Tiranës që Edi Rama ta dëgjojë qartë se ora e llogaridhënies për të po afron!”, shkroi Meta në Facebook.

LEXONI GJITHASHTU

• Përjashtohen 10 ditë nga Kuvendi, Edi Paloka dhe Bujar Leskaj
• Plagoset me thikë kreu i Bashkisë Divjakë, arrestohet autori
• Mesazh për Berishën? Gjiknuri: Protesta më 12 nëntor, një mini ngjarje