Ministrja Krifca siguron fermerët: Kemi nën monitorim situatën e motit të keq

Ministrja e Bujqësisë, Frida Krifca siguroi fermerët se janë duke mbikëqyrur situatën e shkaktuar prej motit të keq në Shqipëri.

Ajo deklaroi se janë duke mbajtur në monitorim të gjithë hidrovorët përmes Drejtorive të Ujitje Kullimit, ndërsa sqaroi se deri tani gjithçka është në nivele normale.

“Drejtoritë janë në gatishmëri dhe komunikim të vazhdueshëm me strukturat e Emergjencave Civile, Bashkitë dhe OSSHE. Autoriteti Kombëtar i Veterinarisë dhe Mbrojtjes së Bimëve, me anë të katër Drejtorive Rajonale është në kontakt me fermerët dhe kujton rekomandime të hollësishme se si ata duhet të tregohen vigjilentë për të marrë masa në mbrojtje të shëndetit dhe jetës së kafshëve në fermë dhe prodhimeve bujqësore,” – shkroi Krifca në faqen e saj në Facebook.

Ministrja theksoi se rreziku i shkarkesave elektrike nga kushtet klimatike kërkon kujdes të veçantë në tufat e blegtorisë që ndodhen në kullota, ndërsa intensiteti i lartë i reshjeve të shiut mund të shkaktojë përmbytje të tokave bujqësore apo serave.

LEXONI GJITHASHTU:

• Shqetësuese: Shqipëria mes shteteve më të rrezikuara nga përmbytjet në botë
• Përmbledhje| Situata prej motit të keq në Shqipëri