Përmbledhje| Situata prej motit të keq në Shqipëri

Qyteti më problematik në territorin e Shqipërisë aktualisht është Shkodra, e cila këtë të diel ka rikthyer imazhet e përmbytjeve të viteve më parë.

Gazetari i Euronews Albania, Teodor Gjerga ka raportuar se niveli i lumit Kir në Shkodër është rritur për shkak të reshjeve të dendura.

Gjithashtu zona e Bardhajve ka pasur prani të ujit në oborret e banesave.

Disa toka bujqësore janë përmbytur pasi lumi Gjadër ka dalë nga shtrati. Shtyllat elektrike janë dëmtuar gjithashtu si pasojë e reshjeve të dendura të shiut.

Problematike është dhe lagjja “Ajasëm” ku e vetmja mënyrë që banorët të komunikojnë me pjesën tjetër të qytetit janë varkat. Në 10 banesa ka prezencë uji.

Harku i Berdicës” në hyrje të Shkodrës është mbuluar nga uji gjithashtu. Ministri i Mbrojtjes, Niko Peleshi bëri me dije se 4 familje janë evakuuar.

Në disa zona në këtë qytet uji shkon deri në 50 centimetra. Për shkak të prurjeve të shumta kanë nisur dhe shkarkimet në hidrocentralin e Vaut të Dejës.

Kryeqyteti ka parë përkeqësim të motit këtë të diel. Për shkak të reshjeve të dendura që kanë nisur që prej mbrëmjes së të shtunës niveli i lumit Lana është rritur.

Shiu ka bllokuar trafikun. Policia Rrugore, ajo e Rendit dhe Forcat e Ndërhyrjes së Shpejtë janë në gatishmëri për të ndihmuar qytetarët dhe shoferët me përkeqësimin e kushteve të motit.

Ndërkohë, prej mbrëmjes së të shtunës Durrësi është përfshirë nga reshje intensive shiu, rrebeshe dhe shkarkesa elektrike.

Era e fortë dhe reshjet kanë sjellë probleme gjatë natës në zonën e Dukatit, në Vlorë dhe në rrugën Transballkanike.

Disa pemë të mëdha kanë rënë dhe kanë penguar qarkullimin. Është dashur ndërhyrja e efektivëve zjarrfikës për të hapur dhe pastruar rrugën.

Edhe në unazën e re të qytetit, në lagjen “10 korriku” në Vlorë, si pasojë e erës së fortë janë rrëzuar pemët dhe është bllokuar qarkullimi rrugor.

Kujtojmë që lundrimi për mjetet e vogla lundruese dhe mjetet e peshkimit është pezulluar deri ditën e martë në orën 22:00. Në Radhimë, Dukat, Llogora e Orikum është ndërprerë për pak orë energjia elektrike.

LEXONI GJITHASHTU:

• Forcat e Armatosura në gatishmëri, Peleshi thirrje pushtetit vendor të marrë masa
• Shqetësuese: Shqipëria mes shteteve më të rrezikuara nga përmbytjet në botë