Rasti “Zhvatja”, në gjyq del emri i një tjetër prokuroreje speciale

Biznesmeni Jordan Kamçev, gjatë dëshmisë së tij në procesin gjyqësor “Zhvatja”, përmendi edhe prokuroren speciale Lile Stefanova si të përfshirë në aferën disa milionëshe. Ai tha se përveç Katica Janevës, e cila ka kërkuar para për ta liruar atë nga paraburgimi dhe përndjekja, edhe Lile Stefanova i kërkoi një klinikë stomatologjike për vajzën e saj.

Të përfshirë sipas Kamçev, janë edhe një avokat dhe motra e tij gjykatëse. Ai e denoncoi rastin pas konsultimit me shefin e shërbimit sekret, që e ka mik, dhe me kryeministrin Zoran Zaev.

“Kush mendoni se i ka nënshkruar vendimet? Kam dëgjuar vetë se si Katica Janeva i ka dhënë urdhra Stefanovas për veprime joligjore. Meqë urdhrat kanë qenë joligjore, pse ajo nuk e ka denoncuar Katica Janevën te prokurori publik?” – tha në sallën e gjyqit dëshmitari Jordan Kamçev.

Kamçev shpjegoi se disa njerëz kishin ardhur për t’i çuar fjalë nga Katica Janeva dhe Bojan Jovanovskit se, nëse dëshiron të shpëtojë duhet të paguajë, e nëse nuk paguan, ndaj tij do të hapeshin edhe të paktën katër procese të tjera gjyqësore.

Çifti Jordan dhe Ana Kamçev, pasi siguruan këstin e parë të zhvatjes prej 350 mijë eurosh ia dërguan Bojan Jovanovskit. Ky i fundit i kishte shpërndarë paratë më pas tek bashkëpunëtorët në kuti këpucësh.

Kamçev i tha gjykatës se ka edhe biznesmenë të tjerë që kanë qenë pre e shantazhit të Bojan Jovanovskit, por që nuk kanë marrë guximin ta denoncojnë. 

Në seancën e ardhshme pritet të dëshmojnë bashkëshortja e biznesmenit, Ana Kamçeva e cila duke pasur bashkëshortin në burg, u ka dhënë paratë shantazhuesve.