Rezolutë për Navalny. Parlamenti Evropian miraton draftin që kërkon hetim ndërkombëtar

Anëtarë të Parlamentit Evropian aprovuan të enjten një rezolutë që bën thirrje për një hetim ndërkombëtar lidhur me helmimin e eksponentit të opozitës ruse, Alexei Navalny.

Dy ditë pas debatit paraprak, ligjvënësit miratuan rezolutën jo detyruese me 532 vota pro, 84 kundër dhe 72 abstenim.

Në këtë draft, Parlamenti Evropian thotë se helmimi i Navalny ishte pjesë e një përpjekjeje sistematike për t’u mbyllur gojën zërave kritikë në Rusi.

Teksti bën gjithashtu thirrje për një hetim mbi shkeljet e dyshuara nga ana e Rusisë të angazhimeve ndërkombëtare në fushën e armëve kimike dhe mbi implementimin e mekanizmave të sanksioneve.

“Është koha t’i japim fund pandëshkueshmërisë së presidentit Putin. Është koha të vendosim sanksione më të mëdha. Le të fillojmë me ndalimin e projektit “Rrjedha e Veriut 2””, deklaroi Anna Fotyga, eurodeputete polake.

Navalny, kundërshtari më i spikatur i presidentit Putin, humbi ndjenjat muajin e kaluar gjatë një fluturimi të brendshëm në Rusi dhe u dërgua në Berlin për mjekim.

Laboratorët në Gjermani, por edhe ata në Francë e Suedi, pas analizave dolën në përfundimin se 44-vjeçari ishte helmuar me një agjent nervor të familjes Noviçok, i përdorur nga ushtria sovjetike.

“Ekzistojnë prova të pakontestueshme se një agjent nervor i grupit Noviçok, i ngjashëm me atë të përdorur ndaj ish-spiunit Sergei Skripal dhe së bijës në mars 2018, u përdor për të vrarë Navalnyn”, tha Josep Borrell, shefi i Politikës së Jashtme të BE.

Nga ana e saj, Rusia ka kryer një hetim paraprak dhe thotë se i duhen më shumë analiza mjekësore paraa se të nisë një hetim penal mbi helmimin.