Viti i ri shkollor, PD: Më shumë se 50 mësues, edukatorë e sanitarë me Covid-19

Partia Demokratike ka denoncuar përmes ish-deputetes Albana Vokshi mungesën e kushteve higjienike dhe infrastrukturën e dobët në pjesën dërrmuese të shkollave, të cilat sipas selisë blu, nuk krijojnë kushte për zbatimin e protokolleve të sigurisë.

“Java e parë e vitit të ri shkollor dëshmoi që qeveria ishte e papërgatitur për pritjen e nxënësve dhe të mësuesve në kushte pandemie. Edi Rama mashtroi me premtimin për rindërtimin dhe hapjen e shkollave të dëmtuara nga tërmeti në këtë shtator. Asnjë nga 103 shkollat e shembura dhe dhjetëra të dëmtuara rëndë nuk ishin gati për rreth 23 mijë nxënës dhe mësues”, tha Vokshi.

Ish-deputetja demokrate, Albana Vokshi, akuzoi qeverinë për mungesë testimesh në radhët e mësuesve, gjë që sipas saj çoi në një numër infektimesh tek mësuesit.

“Vetëm nga të dhënat tona, në të gjithë vendin kanë rezultuar të infektuar që javën e parë më shumë se 50 mësues, edukatorë dhe sanitarë. “Vetëm nga të dhënat tona, në të gjithë vendin kanë rezultuar të infektuar që javën e parë më shumë se 50 mësues, edukatorë dhe sanitarë. Për mësuesit dhe edukatorët duhet pa vonesë testim masiv. Nuk është një investim i madh në para, janë më pak se 2 milionë dollarë, të cilat sigurojnë testim kombëtar për COVID 19 dhe testim serologjik, nëse mësuesit e kanë kaluar apo jo virusin”, theksoi ajo.