Geri Selenica: Garantorët pas Portit të Durrësit, familja mbretërore e Abu Dhabi

Drejtuesi i Qendrës Shqiptare për Studime Strategjike, Geri Selenica thotë se garantues pas projektit për Portin e ri të Durrësit është vetë familja mbretërore në Abu Dhabi.

Në emisionin “Review” në Euronews Albania, Selenica u shpreh se garantues pas investimi, që sipas tij do të ketë efekt domino duke sjellë edhe të tjera, është sheik Tahnoon Bin Zayed, vëllai i emirit të Abu Dhabit.

“Me informacionet miqësore që kam nga Abu  Dhabi është vetë familja mbretërore e Abu Dhabit. Kam dëgjuar që është sheik Tahnoon Bin Zayed, vëllai i emirit të Abu Dhabit, president i Royal Group, grupi financiar më i madh i Emirateve, pronari i bankës më të madhe në vend. Në momentin që Alabar nis investimin do ketë efekt domino, do vijnë shumë investime nga Gjiri Persik edhe në industri të tjera. Më i rëndësishëm është garantuesi se investitori, është shteti, është emiri i Abu Dhabit”, tha Selenica.