Mbi 600 masakra në vit në SHBA, 40 mijë persona të vdekur nga armët në 2022

Për të tretin vit rresht, në Shtetet e Bashkuara janë regjistruar mbi 600 raste të vrasjeve në masë.

Lajmin e ka bërë të ditur organizata jofitimprurëse “Gun Violence Archive”, sipas të cilës bëhet fjalë për episode ku në secilin prej tyre kanë vdekur 4 ose më shumë persona, përfshirë agresorin.

Viti rekord për masakrat në Shtetet e Bashkuara mbetet 2021-shi, me 690 raste, i ndjekur nga 2020-a me 610 dhe 2019-a me 417 vrasje.

Sa i takon 2022-shit, që nga fillimi i tij, tragjeditë si pasojë e lirisë së armëmbajtjes kanë qenë 609. Rasti më i fundit është ai i së mërkurës së kaluar, kur nga të shtënat në një supermarket në Virxhinia humbën jetën 10 persona.

Vetëm tre ditë përpara ngjarjes, 5 vetë ishin vrarë dhe 17 të tjerë kishin mbetur të plagosur në një sulm në një klub nate në Kolorado.

Në tërësi, të vdekurit si pasojë e dhunës së armëve në Shtetet e Bashkuara në 2022-shin kanë qenë rreth 39 mijë e 900 persona, prej të cilëve 18 mijë kanë qenë vrasje dhe rreth 21 mijë e 500 vetëvrasje.

Pas çdo masakre, presidenti Joe Biden ka reaguar duke premtuar masa për frenimin e kësaj epidemie dhune, por deri tani nuk është ndërmarrë asgjë konkrete. Vetë kreu i shtetit duket i pafuqishëm për të vepruar përballë lobit të armëve.

LEXONI GJITHASHTU:

• Departamenti i Shtetit: SHBA kundërshton sulmet turke në Siri dhe Irak
• Të shtëna me armë në SHBA, një burrë vret 10 persona në supermarket