Çfarë zbuloi hetimi i prokurorisë për sulmin kibernetik? Gazetari jep detajet

Gazetari i Euronews Albania, Eni Ferhati ka dhënë detaje në lidhje me hetimin e prokurorisë për sulmin kibernetik ndaj sistemeve digjitale të vendit tonë.

Ferhati u shpreh se prokuroria zbuloi se hakerat fillimisht kanë tentuar të sulmojnë drejtpërdrejtë sistemet e AKSHI-it, por dështuan. Më pas, ata përdorën sistemin administrata.al për të penetruar.

Ndër të tjera, Ferhati nënvizoi se e njëjta mënyrë operimi, u përdor nga hakerat në një sulm kibernetik, në qershor të vitit 2021 në Arabinë Saudite.

“Nga një akt ekspertimi që prokuroria i ka bërë të gjithë situatës, ka rezultuar se hakerat fillimisht kanë tentuar të sulmojnë drejtpërdrejtë sistemet e AKSHI-it, por duke qenë se kanë dështuar në këtë sulm, kanë përdorur vulnerabilitetin e sistemit administrata.al. Në fakt, siç ka dalë në konkluzion edhe Microsoft, është penetruar në sistemin administrata.al, që në maj të vitit 2021, fillimisht nëpërmjet këtij sistemi, i cili ndërlidhet me sisteme të tjera të shtetit tonë.

Sulmi i tyre fillestar ka dështuar. Nga ana tjetër, në një shpjegim të materialit të prokurorisë, gjithashtu thuhet se e njëjta metodë, e grupimit të hakerave iraniane, që dhe më pas IP-të kanë rezultuar që përkojnë me ministrinë e Inteligjencës dhe luftës kundër krimeve kibernetike në Iran, të njëjtën mënyrë operimi e kanë përdorur edhe në një sulm të vitit 2021, në qershor, në Arabinë Saudite. Prokuroria thotë që po heton edhe për përgjegjësi të tjera lidhur me punonjës publikë që nuk e kanë parandaluar këtë sistem kibernetik”, theksoi ai.

Prokuroria e Tiranës kërkoi sot masën e sigurisë “arrest shtëpie” për 5 punonjës në sektorin e IT-së në Departamentin e Administratës Publike lidhur me sulmet kibernetike ndaj Shqipërisë.

Ndërkohë, për 5 personat e akuzuar për shpërdorim detyre me detyrë IT , Gjykata e Tiranës ka caktuar masën detyrim paraqitjeje.

Që prej vitit 2021, Shqipëria ka rënë pre e sulmeve kibernetike. Një sulm kibernetik u shënua më 15 korrik të këtij viti, që bllokoi të gjitha faqet zyrtare shtetërore dhe platformën e shërbimeve online e-Albania.

Ndërkohë, më 14 shtator u sulmua sistemi TIMS në të gjitha pikat kufitare të vendit. Për këto sulme Shqipëria ka fajësuar Iranin dhe ka ndërprerë marrëdhëniet diplomatike me këtë shtet.

LEXONI GJITHASHTU

• Sulmet kibernetike, Gjykata zbut masën e sigurisë për 5 punonjësit e DAP

• EMRAT| Kush janë 5 punonjësit e DAP të arrestuar për sulmet kibernetike
• Sulmet kibernetike ndaj sistemeve shtetërore, Prokuroria firmos 5 urdhër arreste