Listat e kandidatëve për deputetë, PD heq Flamur Nokën nga Kukësi

Publikimi i listës paraprake të kandidatëve për deputetë të Partisë Demokratike për qarkun e Kukësit konfirmoi zërat se ish-deputeti i Kukësit, Flamur Noka nuk do të kandidojë më në këtë qark në zgjedhjet e 25 prillit.

Burime pranë PD bëjnë të ditur për Euronews Albania se ish-deputeti Noka është caktuar të kandidojë në Qarkun e Tiranës. Të njëjtat burime thonë se, emri i tij është propozuar në të gjitha degët e qarkut Kukës, si dhe në shumë degë të tjera të PD në të gjithë Shqipërinë, por, mesa duket, për Partinë Demokratike kandidimi i ish-ministrit të Brendshëm është parë si më i vlefshëm në Qarkun e Tiranës.

Nga procesi i përzgjedhjes së kandidatëve për deputetë janë përjashtuar të gjithë anëtarët e Kryesisë së PD-së pasi do të jetë ky organ që do të marrë vendimin final për listën e kandidatëve.

Sot, PD ka publikuar një listë me emrat e kandidatëve paraprakë për të cilët do të merret mendim nga anëtarësia e PD në Kukës.

Pas përfundimit të procesit të konsultimit me anëtarësinë, kandidatët i nënshtrohen vlerësimit nga Komisionit të Vlerësimit të Kandidatëve.

Pas këtij vlerësimi, rreth 300 kandidatë që do të kalojnë edhe fazën e tretë, lista i dorëzohet për vendimmarrje finale Kryesisë së Partisë Demokratike.

Lexoni gjithashtu:

Përzgjedhja e kandidatëve për deputetë, PD zbulon listën e Qarkut Kukës