Gashi: FIFA të hetojë trajnerin serb, ofendoi shqiptarët gjatë ndeshjes Serbi-Zvicër

Gazetari sportiv, Lorik Gashi thotë se FIFA duhet të hetojë dhe të dënojë trajnerin e kombëtares së Serbisë, pasi ky i fundit ofendoi shqiptarët gjatë ndeshjes Serbi-Zvicër.

Në një intervistë për Euronews Albania, Gashi u shpreh se FIFA po tregohet me dy standarde, duke mos hetuar trajnerin serb, e nga ana tjetër duke filluar një hetim për Granit Xhakën, i cili pas ndeshjes veshi fanelën me mbiemrin Jashari, që i përkiste shokut të skuadrës, Ardon Jashari.

“Ka qenë reagimi i Granit Xhakës drejtuar kampit serb, pankinës serbe. Kanë qenë tensione gjatë ndeshjes. Kemi parë edhe trajnerin e Serbisë, i cili u deshifrua duke ofenduar të gjithë shqiptarët.

Padyshim që duhet një dënim, për këtë nuk ka një hetim nga FIFA, por ka hetim për fanelën që Xhaka ka vendosur ta veshë në fund të ndeshjes. Duken dy standarde nga ana e FIFA-s sa i përket futbollistëve shqiptarë dhe futbollistëve serbë, apo trajnerit serb”, theksoi ai.

Granit Xhaka ka reaguar pas fitores ndaj Serbisë me rezultatin 2-3, ku festoi me një fanelë me numrin 26 që lexonte “Jashari”.

Xhaka ka sqaruar se nuk kishte asgjë politike në veprimin e tij dje.

“Jo, nuk kishte asgjë politike brenda kësaj. Ishte një referim dhe dedikim për Ardonin, i cili është një i ri që po rritet shpejt, e të cilin e këshilloj shumë dhe që meriton shumë respekt për atë që është duke e bërë”, deklaroi futbollisti.

LEXONI GJITHASHTU

• Roland Qafoku: Prej vitesh, UEFA dhe FIFA kanë ‘përkëdhelur’ kombëtaren e Serbisë
• Festoi me fanellën me mbishkrimin “Jashari”, reagon Granit Xhaka
• “Serbia nuk kalon”, reagimi i Kurtit pas fitores së Zvicrës