Zemërim në Marsejë pas rikthimit të masave anti-covid me mbyllje baresh e restorantesh

Ndërsa numri i të infektuarve vijon të rritet në shumë shtete evropiane, autoritetet janë detyruar të rivendosin masa kufizuese në Britani por edhe në disa zona të Francës, të cilat nuk po mirëpriten nga bizneset në Marsejë.

Pronarët e bareve dhe restoranteve kanë shprehur hapur kundërshtitë pas vendimit për të mbyllur aktivitete të tilla, si një masë për të parandaluar përhapjen e COVID-19.

“Po, ne jemi ndëshkuar padrejtësisht, stigmatizuar, gishti po drejtohet automatikisht në bare dhe restorante – ne jemi përgjegjës për rritjen e rasteve të COVID në Marsejë. Është e pakuptimtë. Si dhe pse jemi përgjegjës për këtë, kur bëjmë gjithçka që  përputhet me rregullat? Dhe pavarësisht nga gjithçka, nuk është e mjaftueshme, dhe tani duhet të mbyllemi. Ne ishim tashmë të mbyllur për dy muaj e gjysmë”, tha Jean-Pierre Cotens, pronar bari.

Udhëheqësit civilë në Marsejë reaguan me zemërim ndaj mbylljes së bareve dhe restoranteve të qytetit, duke thënë se ata nuk ishin këshilluar me qeverinë franceze e cila urdhëroi masat për të kontrolluar rritjen e rasteve me  COVID-19.

Ministri  francez i Shëndetësisë, Olivier Veran, urdhëroi që baret dhe restorantet në Marsejë të mbyllen, pasi vendosën qytetin në nivelin maksimal të alarmit për përhapjen e virusit. Politikanët vendas thanë se hapi nuk ishte në proporcion me rreziqet dhe do të shkatërronte ekonominë e tyre.

“Nuk ka asgjë në situatën e shëndetit publik që justifikon këtë veprim. Unë nuk do të lejoj që njerëzit e Marsejës të bëhen viktima të vendimeve politike që askush nuk i kupton,” shkroi ne Twitter kryetari i bashkisë së Marsejës, Michele Rubirola.

Duke iu përgjigjur kritikave, Veran tha se mbylljet e lokaleve ishin ndërmarrë  për të mbrojtur qytetarët dhe se ai kishte njoftuar paraprakisht zyrtarët lokalë. Edhe pronarët e restoranteve në Paris kanë nisur të frikësohen pas mbylljes që nis në Marsejë. Të revoltuar janë edhe qytetarët në Madrid të Spanjës të cilët kundërshtojnë rivendosjen e masave kufizuese sipas të cilëve prekin rajonet më të varfra.