Rezultat surprizë në PD, përjashtohen nga gara për deputetë dy emra të njohur

Dega e Partisë Demokratike në Pogradec ka votuar kundër kandidimit në zgjedhjet e ardhshme për deputetë për ish-kryetarin e Bashkisë, Eduart Kapri si dhe për ish-deputetin, Klevis Balliu.

Kapri ka drejtuar Bashkinë e Pogradecit për një mandat, por duket se ai nuk gëzon mbështetje të gjerë tek anëtarësia e PD-së në këtë qytet.

Ndaj tij kanë votuar kundër kandidimit në zgjedhjet parlamentare të 25 prillit 170 anëtarë nga 450 që kanë marrë pjesë në votim.

Vota më shumë kundër ka marrë Klevis Balliu, i cili në zgjedhjet e kaluara parlamentare ishte deputet i këtij qarku. Kundër kandidimit të tij kanë votuar 310 anëtarë.

Nga ana tjetër, Ervin Salianji ka marrë pëlqim nga pjesa më e madhe e anëtarësisë për t’u kandiduar pasi ka pasur vetëm 28 vota kundër.