Zbulohet magazina me lëndë radioaktive në Kukës, sekuestrohen municione dhe 1 armë

Policia e Kukësit ka evidentuar dhe bllokuar një magazinë, brenda të cilës u gjetën dhjetëra bidona plastikë, ku dyshohet se mbaheshin lëndë radioaktive natyrore dhe lëndë kimike.

Gjatë kontrollit në këtë magazinë, u gjetën dhe u sekuestruan edhe një armë zjarri kallashnikov dhe një sasi municioni luftarak.

“Shërbimet policore të DVP Kukës dhe të Komisariatit të Policisë Kukës, të mbështetura nga inteligjenca informative, se në një ambient (magazinë), në qytetin e Kukësit, mbaheshin lëndë radioaktive natyrore dhe lëndë kimike, si dhe se pronari i këtij ambienti, mbante armë zjarri pa leje, kanë organizuar dhe finalizuar operacionin policor të koduar “Artizanati”.

Si rezultat i këtij operacioni, u arrestua në flagrancë shtetasi D. M., 44 vjeç, banues në Kukës.

Shërbimet e Policisë kapën në flagrancë 44-vjeçarin, në ambientin (magazinë) në pronësi të tij, në qytetin e Kukësit”, thueht në njoftimin e policisë.

Policia njofton se ekspertët e Policisë Shkencore kanë marrë kampione të lëndëve me qëllim ekspertimin e tyre nga ekspertë të fizikës bërthamore.

Ekspertët e Institutit të Policisë Shkencore kanë marrë kampione të këtyre lëndëve, me qëllim ekspertimin kimik të tyre, nga ekspertët e Institutit të Fizikës Bërthamore dhe të Radiologjisë. Vijon puna për të përcaktuar shkallën e rrezikshmërisë së këtyre lëndëve, për shëndetin e qytetarëve, si dhe për të përcaktuar qëllimin e mbajtjes dhe të përdorimit të tyre”, thuhet në njoftimin e policisë.

LEXO GJITHASHTU:

• Mbanin armë në lokalin në pronësi të tyre, arrestohen babë e bir
• Rrëmbyen, rrahën dhe lanë pa ndjenja në rrugë një person, arrestohen ‘të fortët’
• Aldo Bare kërkon uljen e dënimit, padit në SPAK Gjykatën e Lartë. Ankesë dhe në ILD