Sporte ekstreme në det, djemtë që bëjnë ‘kitesurfing’ dhe ‘windsurfing’ në Durrës

Jo të gjithëve u pëlqejnë stuhitë, dallgët dhe era e fortë. E të paktë janë guximtarët, që në motin e keq të dimrit hyjnë në det. Por ky nuk është rasti i këtij grupi djemsh.

Me makinën mbushur me pajisje, ata vijnë në Durrës për të sfiduar dallgët e mëdha.

Djemtë praktikojnë 2 sporte ekstreme ujore, siç janë “kitesurfing” dhe “windsurfing”.

Se përse, na e tregojnë më mirë vetë ata.

“Është spektakolare. Çdo njeri duhet ta provojë, sidomos ne në Shqipëri që kemi kushtet perfekte”, thotë Fation Konci, sportist.

“Me këtë sport je ‘All in’. I ke të gjitha. Ke detin, ke erën, shiun, diellin, rërën, adrenalinën, ajri i pastër nuk mungon. Pra i ke të gjitha”, shprehet Ersi Lilaj, sportist.

Por mesa duket jo të gjithë i dinë këto, sepse ata që i praktikojnë 2 sportet janë ende të paktë.

“Shqiptarët janë me dëshirë sportistë, por janë pak të vakët në sporte në përgjithësi”, thotë Konci.

Për ta mendon natyra. Nuk u duhet shumë, veçse një erë e fortë e dallgë të mëdha.

Megjithatë, e kanë një kërkesë.

“Ka një gjë, që ne kemi nevojë për vende të përshtatshme për këtë sport. Në Durrës janë 2-3 vende, në të cilat godet më mirë era dhe do të ishte mirë që bashkia të organizohej, që të mund të realizojmë spotet apostafat për këtë sport”, thotë Fation Konci.

“Kitesurfing” i referohet sërfit mbi një dërrasë me trupin të lidhur me një parashutë, në ndryshim nga “windsurfing”, që ka të bëjë me sërfin mbi një dërrasë me velë.

LEXONI GJITHASHTU:

• Në Shqipëri vajzat po konsumojnë më shumë alkool sesa djemtë, thotë nutricionistja
• Mosha më e përshtatshme për t’u martuar për djemtë dhe vajzat, sipas shqiptarëve