Lleshaj: Shtetësia kompetencë e ministrisë, nëse Ronaldo vendos të luajë për Shqipërinë mund t’ia japë presidenti

Ministri i Punëve të Brendshme, Sandër Lleshaj në një intervistë për Ilva Now i dha përgjigje çështjes së diskutuar kohët e fundit lidhur me dhënien e nënshtetësisë nga presidenti i republikës, procedurë kjo që sipas ligjit duhet të kalojë nga Ministria e Brendshme.

Z. Lleshaj tha se e ka ndjekur me shqetësim këtë çështje pasi Ministria e  Brendshme është institucioni përgjegjës për të dhënë nënshtetësisë dhe procedura finalizohet me dekretin e presidentit.

Sipas tij, për këtë çështje rezulton të ketë një anomali që duhet sqaruar, pasi volumi i shtetësive të dhëna përmes procedurës së veçantë direkt nga kreu i shtetit është i madh dhe pothuajse i barabartë me numrin e shtetësive të dhëna nga ministria, sipas procedurave normale.

“Si rregull shtetësia kalon nga Ministria e Brendshme dhe finalizohet nga presidenti me dekretin, presidenti është hallka e fundit.

Për këtë çështje kemi komunikim pasi rregullisht ministria përcjell praktika për dekretim, por kjo çështjet e hapura për procedurat e rregullta dhe të mbyllura direkt tek presidenti na ka krijuar një farë shqetësimi. Rezulton që kemi një anomali që duhet sqaruar.

Volumi i shtetësive të dhëna përmes procedurës së veçantë është i madh, është afërsisht sa ai procedurave të dhëna në mënyrë të rregullt. Përjashtimi është barazuar me rregullin në numra.

Kjo e bën disi shqetësuese, po dua t’u inkurajoj ta sqaroni më mirë këtë me presidentin. Ne si ministri

nuk kemi tagër t’i kërkojmë llogari presidentit. Po mundohemi ta kuptojmë.

Çështja e shtetësisë është përgjegjësi e Ministrisë së Brendshme.

Ligji parashikon që mund të jepen shtetësi edhe me një procedurë më të reduktuar sa i përket kushteve, kur ka një interes kombëtar, një të huaji mund t’i kërkohen më pak kritere, p.sh jo të ketë 5 vjet në Shqipëri. P.sh, një futbollist që i jepet shtetësia për interes kombëtar. Nëse Ronaldo nesër vendos të luajë me Shqipërinë. Kjo është fryma e ligjit”, sqaroi ministri.

Intervista e plotë: