Ndërtohen katër tunele tek “Shqiponja”, Balluku apel drejtuesve të automjeteve

Ministrja e Infrastrukturës, Belinda Balluku ka  inspektuar nisjen e punimeve për fazën e tretë të Unazës së Re në segmentin e rreth rrotullimit tek zona e njohur si “Shqiponja”.

Znj. Balluku tha se puna ka avancuar pavarësisht se udhëtarët që kalojnë çdo ditë në këtë segment nuk e vënë re progresin.

Për shkak të nisjes së fazës së tretë të punimeve, për katër muajt e ardhshëm segmenti rrugor në Unazën e Re pranë rreth rrotullimit të “Shqiponjës” do të ketë një trafik të rënduar.

Pë këtë arsye, ministrja e Infrastrukturës u ka bërë thirrje drejtuesve të automjeteve që të përdorin Rrugën e Ndroqit ose Rrugën e Elbasanit kur e kanë të pashmangshme udhëtimin drejt kryeqytetit.

“Shpresoj që të kapim afatet dhe loti të përfundojë brenda katër muajve”, tha ministrja duke shtuar se, ka përfunduar ndërtimi fillestar i katër tuneleve që do të bëjnë shpërndarjen e trafikut në rreth rrotullim.

Gjithashtu ajo nënvizoi se, ka pasur vonesa për shkak të politizimit të çështjes ndërsa afati për përfundimin e të gjithë segmentit është tetori i vitit të ardhshëm.

Projekti parashikon dhe rikualifikimin e Lumit të Lanës kurse prishja e banesave për lotin e tretë do të kryhet nesër.