Kurti i përgjigjet SHBA-BE: Nuk shantazhohemi dhe as s’kemi frikë

Kryeministri i Kosovës, Albin Kurti, në një intervistë për agjencinë franceze të lajmeve AFP, tha se do t’i rezistojë çdo përpjekjeje për “shantazh” nga ana e Perëndimit.

Në lidhje me insistimin e BE-së dhe SHBA-ve për themelimin e Asociacionit Albin Kurti tha se ajo që po kërkojnë është barazi dhe njohje reciproke.

“Ne nuk mund të shantazhohemi. Nuk mund të kemi frikë. Ne jemi njerëz të guximshëm dhe ajo që kërkojmë është trajtim i drejtë, barazi dhe njohje reciproke. Nuk është e drejtë që të bësh presion mbi vendin më pro-evropian, pro-amerikan dhe demokratik në Ballkanin Perëndimor. Presioni duhet të bëhet mbi Beogradin”, u shpreh Kurti.

Kurti i kërkoi ndërkombëtarëve që presionin ta orientojnë mbi presidentin serb, Aleksandër Vuçiç, duke thënë se Beogradi po kërkon kthim prapa në kohë.

Kurti e cilësoi Serbisë, një “autokraci” që ka lidhje të ngushta me Rusinë dhe po vazhdon të destabilizojë Evropën Juglindore, rrjedhimisht Ballkanin Perëndimor.

Kryetari i Partisë Demokratike të Kosovës, Memli Krasniqi, në një intervistë për Zërin e Amerikës tha se partia që ai drejton, nuk e mbështet në asnjë mënyrë kërkesën për themelimin e Asociacionit të komunave me shumicë jashtë marrëveshjes finale me Serbinë.

Ai tha se e vetmja mënyrë është që Asociacioni të themelohet si pjesë e marrëveshjes së përgjithshme ndërmjet Kosovës dhe Serbisë, e cila sipas tij, duhet të përfshijë dhe njohjen e ndërsjellë sepse një marrëveshje finale, pa njohjen e ndërsjellë, nuk ofron stabilitet për Kosovën.

Krasniqi akuzoi  kryeministrin Albin Kurti për mungesë të koordinimit me Shtetet e Bashkuara të Amerikës, duke e cilësuar qëndrimin Kurtit mbi Asociacionin, një kauzë false, me të cilën erdhi në pushtet, e që vazhdon ta mbajë peng.

Krasniqi theksoi se nga takimet që ka pasur në Uashington këto dy ditë, në Departamentin e Shtetit dhe në Departamentin e Mbrojtjes, nuk ka pasur një kërkesë të tillë që çështja e Asociacionit dhe “marrëveshjes finale” të jenë të ndara.

LEXONI GJITHASHTU:

• Kurti për zgjedhjet: Serbia nuk mund të vendosë për Kosovën
• Albin Kurti: Asociacioni një etnik nuk është i mundur në Kosovë