I dyshuar për vrasjen e të riut pas sherrit për faturën, zgjatet burgimi i Kobrës

Gjykata Themelore në Prizren ka vendosur të zgjasë dhe me 1 muaj afatin e paraburgimit për shtetasin, Dibran Hoxhaj, i njohur si “Kobra”, i dyshuari krysor për vrasjen e 31-vjeçarit nga Kukësi Visar Cengu.

Me 1 muaj u zgjat afati i paraburgimit dhe për 5 personat e tjerë të cilët dyshohet se kanë marrë pjesë në vrasjen e të riut shqiptar.

Lajmi u konfirmua nga zëdhënësi i Gjykatës Themelore të Prizrenit, Marcel Lekaj.

“Gjyqtarja e procedurës paraprake ka konsideruar se janë plotësuar kushtet ligjore për vazhdimin e masës së paraburgimit, ngase të pandehurit me qëndrim në liri mund të fshihen apo arratisen me qëllim të shmangies nga përgjegjësia penale. Gjithashtu, duke marrë parasysh mënyra dhe rrethanat nën të cilat dyshohet se janë kryer veprat, veçanërisht vepra penale e vrasjes së rëndë, duke marrë parasysh faktin se të dyshuarit janë të njohur për organet e drejtësisë, pasi që janë kryer të veprave penale të natyrës së ndryshme. Gjyqtarja e procedurës paraprake ka konsideruar se vazhdimi i paraburgimit në këtë fazë është i domosdoshëm dhe i arsyeshëm”, tha Lekaj për Express.

Ngjarja ndodhi në orët e para të mëngjesit të datës 3 janar, ku në ambientet e lokalit në pronësi të Dibran Hoxhës, u vra me armë zjarri 31-vjeçari Visar Cengu, si dhe u plagos shoku i tij 27-vjeçar. Ngjarja ndodhi në parkingun e lokalit pas një sherri banal për faturën.

LEXO GJITHASHTU:

• “Shkak fatura e tavolinës”- Zbulohet si nisi sherri me 1 viktimë në lokalin e natës
• “E qëlluan në makinë”- Xhaxhai zbulon si iu vra nipi pas sherrit për faturën
• Policia detaje nga vrasja për faturën në “Kobra City”: Të shtënat filluan në lokal