Shkaktoi aksidentin me vdekje në Tiranë, arrestohet 19-vjeçari

Policia e Tiranës ka arrestuar në flagrancë drejtuesin e mjetit që shkaktoi aksidentin te Fresku, ku humbi jetën një 18-vjeçar.

Nga hetimet e kryera rezultoi se drejtuesi i automjetit që përplasi për vdekje 18-vjeçarin që po lëvizte me motor, nuk është pronari i mjetit, por një 19-vjeçar që e kishte në përdorim.

Materialet në ngarkim të 19-vjeçarit i kaluan prokurorisë për veprime të mëtejshme.

“Në vijim të punës për zbardhjen e rrethanave të aksidentit të ndodhur rreth orës 23:30 të mbrëmjes së djeshme, te Fresku, ku si pasojë e përplasjes së një automjeti me një motor elektrik, mbeti i dëmtuar shtetasi E. S., 18 vjeç (drejtuesi i motorit elektrik), i cili më pas humbi jetën në spital, specialistët e Komisariatit Rajonal të Policisë Rrugore Tiranë kanë kryer veprime hetimore për vënien përpara përgjegjësisë ligjore të drejtuesit të automjetit të përfshirë në këtë aksident.

Nga veprimet hetimore ka rezultuar se në kohën që ka ndodhur aksidenti, automjeti nuk drejtohej nga pronari i tij, shtetasi F. A., por drejtohej nga shtetasi S. K., 19 vjeç, banues në Tiranë.

Nga verfikimet ka rezultuar se shtetasi S. K. ishte i pajisur me lejen përkatëse të drejtimit dhe nuk ka qenë nën efektin e alkoolit në kohën që është përfshirë në aksident.

Automjeti dhe motori elektrik u sekuestruan në cilësinë e provës materiale.

Në përfundim të veprimeve, shtetasi S. K., 19 vjeç, banues në Tiranë, u arrestua në flagrancë dhe materialet i kaluan Prokurorisë, për veprime të mëtejshme”, thuhet në njoftimin e policisë.

LEXONI GJITHASHTU: 

• Aksident në Durrës, humb jetën 66-vjeçari
• Përplaset me trafikndarësen, shpërthen në flakë makina