“Kam video-inçizime për Deharin”- Specialja merr në pyetje deputetin e LVV

Duket se marrëdhënia mes deputetit të Vetëvendosjes, Haki Abazi dhe kryeministrit Albin Kurti ka shkuar drejt një krisjeje pa kthim.

Deputeti i LVV-së mbajti këtë të enjte një konference për shtyp, ku foli për ekzistencën e një video-inçizimi që sipas tij do të zbardhte zhdukjen e mostrave në IML të Astrit Deharit.

Në lidhje me këtë deklaratë të fortë ka reaguar dhe kryeprokurori i Prokurorisë Speciale, Blerim Isufaj, i cili ka thënë se do të merret në pyetje deputeti i LVV-së.

Prokuroria Speciale ka konfirmuar për Euronews se kjo do të ndodhë ditën e hënë për shkak se dita e nesërme është pushim zyrtar.

Kujtojmë se rasti i zhdukjes së mostrave të Astrit Deharit, një të riu kosovar i cili humbi jetën në rrethana misterioze në paraburgim, ende po hetohet nga Prokuroria në Prishtinë.

Deputeti i Vetëvendosjes, Haki Abazi, i bëri deklaratat e tij nga holli i Kuvendit, në nisje të seancës plenare të kësaj të enjteje.

Abazi tha se ka video-incizime që dëshmojnë kush i ka zhdukur mostrat e Astrit Deharit në Institutin e Mjekësisë Ligjore.

“Audio-incizimet konfirmojnë diskutimin ndërmjet Saranda Bogujevcit, Mimoza Kusarit e Dejona Mihalit për ngulfatjen e zërit të deputetëve brenda Kuvendit. Video-incizimet janë ato që ju duhet t’i kërkoni për të konfirmuar se kush ka zhdukur mostrat e Astrit Deharit”, tha Abazi.

Sipas tij, pyejet që ka ngritur ai rreth rastit Dehari, kanë bërë që të kërkohet shkarkimi i tij.

“Hulumtimi im, diskutimet që kam bërë me njerëz përgjegjës kanë sjellur tek shkarkimi dhe anatemomi brenda VV-së. Shkarkimi im është minor ndaj borxhit që kemi se ka ka ndodhur me rastin Dehari, si është e mundur në pushtetin e VV-së të zhduken mostrat e Astrit Deharit, dhe kryeministri Kurti të mos e thotë asnjë fjalë të vetme”, vijoi Abazi.

LEXONI GJITHASHTU: 

• Krisje në LVV, Abazi i shpall luftë Kurtit. Pritet të flasë për skandalet e qeverisë
• Kurti analizon marrëdhëniet me Shqipërinë: Mund të bëjmë më shumë