Një vit luftë me Rusinë, ukrainasit: Vit i vështirë, por e mira do të fitojë!

Një vit luftë me Rusinë ka tronditur fuqishëm mendjet dhe shpirtrat e miliona ukrainasve. Jetët, shqetësimet dhe shpresat e tyre sot janë shumë ndryshe se më parë. Çdo gjë sot vërtitet rreth luftës.

“Ishte viti më i vështirë i jetës sime dhe i të gjithë ukrainasve. Jam e sigurt se fitorja është përpara, por ne nuk e dimë se sa kohë do të na duhet të presim dhe se sa jetë të tjera do sakrifikohen përpara se kjo të ndodhë. Kjo është e vetmja gjë që na shqetëson aktualisht,” – u shpreh Diana Shestakova, punonjëse në një shtëpi botuese.

“Nga njëra anë na duhen më shumë armë për t’i dhënë sa më shpejt fund luftës, por sa më shumë armë të ketë, aq më shumë akte armiqësore do të verifikohen. Jemi në një rreth vicioz. Është një thikë me dy presa. Nga njëra anë furnizimi me armë është pozitiv, por ka pasoja,” – tregoi Boris, biznesmen.

“Po, kohët janë të vështira. Nuk mund të krahasohen me jetën në paqe. Por jeta vazhdon dhe teksa vjen pranvera do të vijë edhe fitorja. E mira fiton gjithmonë,” – tha pensionistja Alla Valentinovna.

Por edhe pse ka kaluar një vit që nga fillimi i luftës që tronditi jetët e qytetarëve, asgjë nuk tregon se konflikti po shkon drejt zgjidhjes.

LEXONI GJITHASHTU:

• Çfarë do ndodhë me Ukrainën? Ekspertët: Perspektiva e paqes, ende larg
• Frikë nga përdorimi i armëve bërthamore nga Putin? Flet deputeti ukrainas