Homazhe për viktimat në Greqi, qytetarëve e Korçës ndezin qirinj në katedrale

Në nder të viktimave të aksidentit tragjik në Greqi, në Korçë janë mbajtur homazhe duke ndezur qirinj në sheshin e katedrales së qytetit.

Te pranishmit më pas i janë drejtuar konsullatës greke, ku prezent ka qenë dhe konsulli i përgjithshëm, i cili ka falënderuar qytetarët korçarë për solidaritetin e treguar.

“Mbajmë zi sot bashkë me popullin mik shqiptar edhe me qytetarët grekë që jetojnë në Shqipëri. Është tragjike të kujtosh aksidentin e ndodhur në Greqi para disa ditësh. Dua të falënderoj qytetarët shqiptarë dhe zyrtarët për iniciativën e vlefshme dhe shembullore”, tha Nikos Gitopoulos, konsulli grek në Korçë.

Kryetari i bashkisë së Korçës, Sotiraq Filo ka shprehur ngushëllimet edhe për 6 familjet shqiptare që humbën të afërmit e tyre në aksidentin e trenave.

“Dita e sotme është shpallur ditë zie kombëtare për të kujtuar viktimat e aksidentit tragjik në Greqi. Gjithë populli shqiptar dhe ai i Korçës bashkohet me dhimbjen e familjarëve të këtyre viktimave dhe popullin mik grek. Kujtojmë viktimat dhe shpresojmë ngjarjeje të tilla mos ripërsëritën më”, u shpreh Filo.

Edhe qytetarët tregojnë dhimbjen e përjetuar nga aksidenti i rëndë.

“Duke pasur parasysh se ne jemi bërë pjesë e këtij akti për të ngushëlluar gjithë ata që humbën jetën në aksidentin tragjik dhe të rinjve që u shuan në lule të rinisë. Edhe ne e ndiejmë boshllëkun e atyre familjeve që humbën fëmijët e tyre”, shprehet një qytetare.

Mes viktimave nga aksidenti tragjik ishin edhe 6 shqiptarë, ndërkohë që 2 të tjerë ndodhen momentalisht në spital në gjendje të rëndë.

LEXONI GJITHASHTU:

• Me nderime ushtarake, pamjet nga varrimi i studentes shqiptare në Greqi
• 6 shqiptarë të vdekur në aksidentin hekurudhor në Greqi, Xhaçka shpreh ngushëllimet