Pandemia e Covid-19, Bashkimi Evropian i dhuron Shqipërisë 30 respiratorë të tjerë

Bashkimi Evropian i ka dhuruar Shqipërisë 30 respiratorë të rinj në përpjekje për t’i bërë ballë pandemisë së Covid-19. Lajmi bëhet i ditur nga delegacioni i BE-së në Shqipëri përmes një shënimi në faqen zyrtare në “Facebook”.

“Ambasadori i BE-së Luigi Soreca i dorëzoi sot autoriteteve shëndetësore shqiptare 30 respiratorë të tjerë për trajtimin e rasteve të rënda të pacientëve me COVID-19 të siguruara përmes UNOPS. Spitalet shqiptare do të kenë më shumë mundësi në trajtimin e pacientëve’, thuhet në njoftim.

Bashkimi Europian po mbështet Shqipërinë me një asistencë të përgjithshme prej mbi 50 milionë eurosh, nga të cilat 4 milionë euro do të shkojnë për furnizimin e pajisjeve mjekësore të menjëhershme, që shpëtojnë jetën.

Gjatë fjalës së tij , ambasadori i Bashkimit Europian, Luigi Soreca thotë se dhurimi i pajisjeve mjekësore është tregues i qartë se BE-ja ka lidhje të fortë me Shqipërinë.

“Në këto kohë të vështira, BE dhe shtetet anëtare të saj kanë mbajtur angazhimin dhe mbështetjen e tyre për Shqipërinë. Dhurimi i gjashtë i sotëm i pajisjeve urgjente mjekësore është një shembull tjetër konkret i kësaj lidhje të fortë. Lufta kundër COVID19 mund të fitohet vetëm së bashku”, tha Soreca.

Krahas BE-së, ndihmë për Shqipërinë në pajisje mjekësore për të trajtuar pacientët e prekur nga Covid-19 kanë dhënë Shtetet e Bashkuara të Amerikës, si edhe vendet aleate të Aleancës së Atlantikut të Veriut (NATO).