Ku ka mbetur dialogu? Eksperti: Presioni amerikan ndaj Serbisë po jep rezultate

Eksperti i sigurimit Bedri Elezi u shpreh se “presioni” i Amerikës, për dialogun mes Serbisë dhe Kosovës ka filluar të japë rezultate.

I ftuar në një lidhje direkte për Euronews Albania, eksperti ka thënë se qeveria amerikane është fokusuar që ky dialog mes dy vendeve të ecë përpara dhe se tashmë situata mes dy vendeve është më e qetë.

“Si thashë e më herët ka një progres të dialogut mes dy palëve. Qeveria amerikane është e fokusuar që dialogun ta dërgojë përpara, kemi parë shumë aktivitete të përfaqësuesve të qeverisë amerikane në Beograd, një marrëdhënie të fundit mjaft të afërt mes qeverisë së Serbisë dhe qeverisë amerikane.

Si e kemi parë ambasadori i SHBA-së në Beograd ka një aktivitet të shtuar me qeverinë e Serbisë, çfarë nënkupton që edhe kërkesat e SHBA-së për çështjen e dialogut apo të normalizimit të marrëdhënieve te Serbia tani kanë një rezultat më të mirë se në të kaluarën.

Tashmë siç duket kemi mundësi që vërtet të tejkalojmë rreziqet që mund të vijnë nga Serbia, si kemi parë në të kaluarën, ku Serbia kishte mbështetur struktura të sigurisë të caktuara në veriun e Mitrovicës, të cilat kishin zhvilluar aktivitete të rrezikshme ku rrezikuan jo vetëm qytetarë serb, por edhe policinë e Kosovës.

Këto aktivitete nuk po i shikojmë më. Kemi një rezultat të qeverisë amerikane në dialogun mes Kosovës dhe Serbisë”,- tha për Euronews eksperti Bedri Elezi.