Qytetarët shfaqen indiferentë dhe shkelin masat anti-covid

Policia e Shtetit vijon të kryejë kontrolle në të gjithë qytetet e vendit për të monitoruar zbatimin e masave anti-Covid. Kështu, gjatë kontrolleve janë pikasur 692 qytetarë që nuk mbanin maskë, të cilët nuk i kanë shpëtuar masës administrative prej tre mijë lekësh të reja.

“Si rezultat i këtyre kontrolleve, gjatë 24 orëve të fundit, në të gjithë vendin, Patrullat e Përgjithshme dhe ato të Policisë Rrugore kanë evidentuar dhe ndëshkuar me masën administrative 3.000 lekë secili, 692 qytetarë që janë konstatuar duke lëvizur pa maskat mbrojtëse’, njofton policia.

Në kuadër të këtij aksioni, Policia bën të ditur se ka gjobitur me nga një milion lekë të reja nëntë lokale, subjekte këto, që vepronin pa respektuar masat e diktuara nga Ministria e Shëndetësisë.

“Gjithashtu, gjatë kontrolleve, shërbimet e Policisë kanë konstatuar 9 lokale, në ambientet e të cilëve kishte muzikë pas orës 20:00 dhe nuk respektoheshin protokollet e sigurisë. Secili prej administratorëve të këtyre lokaleve është ndëshkuar me masën administrative 1.000.000 lekë”,  sqaron policia.

Pavarësisht miratimit të masave kufizuese nga ora 22:00 e mbrëmjes deri në 06:00 të mëngjesit, ka pasur prej atyre qytetarëve dhe lokaleve, të cilat nuk e kanë zbatuar këtë rregull.

“Shërbimet e Policisë, gjatë kontrolleve të ushtruara për zbatimin e masave kufizuese, kanë konstatuar 2 lokale ku ushtrohej aktiviteti pas orës 22:00. Secili nga subjektet shërbimet është ndëshkuar me masën administrative 1.000.000 lekë. Gjithashtu, pas orës 22:00 janë konstatuar edhe 27 qytetarë që lëviznin në rrugë pa arsye të domosdoshme, të cilët janë ndëshkuar me masën administrative 10.000 lekë secili”, thuhet në njoftimin e Policisë së Shtetit.

Gjatë javëve të fundit në Shqipëri është vënë re një shtim i numrit të qytetarëve të infektuar nga coronavirus. Ky tregues, por edhe rritja e shtrimeve në spitale detyroi autoritetet të vendosin masa kufizuese nga ora 22:00 deri në 06:00 të mëngjesit.