Presidenti austriak nga Kuvendi: Sot pasdite hapim Forumin Ekonomik

Presidenti i Austrisë, Alexander Van der Bellen, ndodhet këtë të hënë në një vizitë zyrtare në Tiranë.

Në fjalën e tij në Kuvend, presidenti bëri me dije se sot pasdite do të hapet Forumi Ekonomik bashkë me praninë e presidentit Bajram Begaj.

“Marrëdhëniet ekonomike mes Shqipërisë dhe Austrisë janë të forta dhe këtë e vërteton prania e 50 kompanive austriake në Shqipëri,” – u shpreh Van der Bellen.

Presidenti austriak u shpreh se hapja e këtij forumi do të forcojë edhe më shumë ekonomikisht dy vendet.

Ai nënvizoi vlerën e artistit shqiptar Eno Peci në Operën e Vjenës duke theksuar se lidhjet kulturore janë po aq të rëndësishme.

Ndërkaq, lidhja mes arsimit në dy vendet reflektohet, sipas presidentit austriak prej kontakteve të shumta mes studentëve dhe stafit akademik që kanë ndërtuar ura me njëri-tjetrin dhe dy shtetet.

LEXONI GJITHASHTU:

• Presidenti i Austrisë nga Tirana: Mbështesim Shqipërinë në rrugëtimin drejt BE-së
• Begaj pret presidentin e Austrisë: Mirënjohje për mbështetjen në rrugëtimin drejt BE