Gara në BKH, vetëm 39 kandidatë plotësojnë kushtet

FBI-ja shqiptare do të jetë e paplotë. Kjo pasi në përfundim të fazës së katërt, nga 55 kandidatë për Byronë Kombëtare, vetëm 39 arritën të kalojnë testin e intervistës, ndërkohë që struktura parashikon të ketë 60 hetues.

Të kualifikuarit tashmë do duhet të kalojnë në testin e poligrafit, ndërsa më pas do duhet të plotësojnë deklaratën e pasurisë dhe formularin e interesave private për pozicione të ndryshme në Byronë Kombëtare të Hetimit.

Ky proces pritet të përmbyllet në fund të këtij muaji ose në fillim të nëntorit. Pas përzgjedhjes, 60 oficerët e BKH-së pasi të marrin detyrën zyrtarisht do të dërgohen për trajnim 1-mujor në SHBA për t’iu bashkuar më pas SPAK-ut.

Punonjësit e BKH-së supervizohen dhe operojnë vetëm nën drejtimin e Drejtuesit të Prokurorisë së Posaçme dhe Prokurorëve të Posaçëm të Prokurorisë së Posaçme.