Rikonfirmohet Kryemadhi, anëtarësia i kushtëzon votën kryetares, pa maskë s’i lejohet hyrja në QV

Lëvizja Socialiste për Integrim organizoi sot procesin zgjedhor për zgjedhjen e kryetarit të partisë për katër vitet e ardhshme dhe delegatët e konventës kombëtare.

Monika Kryemadhi do të rifreskojë mandatin e saj për katër vitet e ardhshme pasi përballë nuk kishte asnjë kandidat.

Pas hedhjes së votës në kutinë e votimit, Kryemadhi u shpreh se në zgjedhjet e 25 prillit do të garojë në disa zona zgjedhore ku një ndër to është qarku i Fierit.

“Kodi i ri Zgjedhor i ka dhënë hapësira pafund LSI-së, jo vetëm për të zgjeruar mundësitë e saj, por për të përfshirë sa më shumë të rinj dhe të reja në procesin e zgjedhjes për deputetë në të ardhmen,” – u shpreh Monika Kryemadhi.

Sa i takon zgjedhjes së drejtuesve në qarqe dhe koalicionit parazgjedhor, Kryemadhi u shpreh se gjithçka do të ndodh pas datës 5 dhjetor kur do të zgjidhen edhe strukturat e reja dekretuese nga delegatët e konventës kombëtare.

“Në Konventën e 5 dhjetorit, delegatët që do të dalin sot, do të jenë ata që do të zgjedhin edhe strukturat drejtuese të LSI-së,” – tha Kryemadhi.

Për herë të parë kryetares së partisë iu kushtëzua e drejta e votës, pa maskë nuk mund të hidhte fletën në kuti.

“Në fakt mesa duket partia ma mbledh, nuk ma mbledh dot njeri tjetër,” – ironizoi Kryemadhi.