A do të “thyhet” Shkodra? Benet Beci zbulon në Euronews strategjinë e socialistëve

Kandidati i Partisë Socialiste për Bashkinë e Shkodrës, Benet Beci, ishte i ftuar këtë të martë në Euronews Albania ku foli në lidhje me garën elektorale në qytetin verior.

Duke u ndaluar te fakti që Bashkia Shkodër ka qenë historikisht një bastion i djathtë, Beci zbuloi dhe planin e tij dhe Partisë Socialiste për të triumfuar në zgjedhje.

Kandidati i PS tha se zgjedhjet lokale nuk janë beteja politike mes dy kampeve, por beteja për ofertën më të mirë ekonomike për qytetin.

Beci nënvizoi se shpreson që shkodranët të zgjedhin ofertën e tij ekonomike për ta shndërruar qytetin në një qendër rajonale.

“Ajo që dihet në Shkodër sot është se nuk është një betejë mes Partisë Demokratike dhe Partisë Socialiste. Është një betejë mes ofertës ekonomike për zhvillimin e Shkodrës, kush është në gjendje dhe kush mund ta bëjë më mirë këtë zhvillim të qytetit të Shkodrës. Nëse fokusohemi në këtë, ky nuk është një diskutim politik. Besoj se Shkodra nuk ka nevojë për një diskutim politik thelbësor sidomos në zgjedhjet bashkiake. Shkodra ka nevojë për të gjetur rrugët e zhvillimit, të investimeve, të rritjes së ekonomisë, të zhvillimit të infrastrukturës dhe të kthimit të Shkodrës në një qendër rajonale.

Dhe në këtë diskutim beteja bëhet mbi programin dhe ofertën. Dhe oferta që unë kam nuk është një program politik por një program ekonomik”, tha Beci.

LEXONI GJITHASHTU:

• Tritol Ndrecës në Vaun e Dejës, Benet Beci: Në garë vihet me oferta, jo me luftë
• “Erdha me tram”, Veliaj ironizon opozitën: Pse s’bëni transport falas në Shkodër