“Nuse vetëm për letra”, komedia me regji të Leka Bungos mbush skenën në Korçë

Për dy netë me radhë teatri “Andon Zako Çajupi” ka qenë i tejmbushur nga artdashësit korçarë, të cilët kanë ndjekur me kërshëri komedinë “Nuse vetëm për letra”.

Një ngjarje reale, e ndërtuar mbi karaktere tepër të veçanta, sa komike e deri diku edhe të çuditshme. Në qendër të veprës ishte një familje, e cila për vite me radhë, shfrytëzonte martesat fiktive për të siguruar të ardhura, ndërsa personazhet e tjerë, paguanin për të siguruar letra në mënyrë që të mund të qëndronin në SHBA .

“Komedia është shkruar shumë vite përpara, tema e saj ama është e gjithëkohëshme, është temë që ka qenë dhe do jetë. Ngjarje janë të vendosur në familje emigrantësh dhe Shqipëria në atë kohë e do ngelet një vend me emigracion, padyshim që edhe tema është për të. Ajo që është e veçantë është kur e shkrova e shkrova për këtë teatër dhe me ne fund ky bashkëpunim u realizua,” – u shpreh regjisori Leka Bungo.

Vetë aktorët tregojnë kënaqësinë e marrë nga duartrokitjet e korçarëve.

“Ne kemi publik të shkëlqyer edhe pse shfaqja ishte shumë e lezetshme, them se pritja ishte emocionuese,” – tregoi Guri Koço.

“Mesazhi i veprës është i shumëfishtë por një do them, në jetë nuk shkohet me gënjeshtra dhe hipokrizi,” – shtoi ai.

“Sot u shfaqa përballë publikut të Korçës në rolin e Liufuse, personazhi nga Kina që donte të martohej, publiku e priti jo vetëm personazhin por gjithë komedinë. Tema është aktuale, e prekshme dhe i flet kohës,” – tha Juxhin Plovishti.

Kjo vepër pritet që të shfaqet në sallat teatrale të qyteteve të tjera në Shqipëri.

LEXONI GJITHASHTU:

• Komedia ‘Borgjezi fisnik’ e Molierit vendoset në teatrin e Durrësit
• Rita Gjeka thirrje për një teatër të dytë: Nuk na del një, shfaqjet janë të shpeshta