Dita Ndërkombëtare e Punëtorëve pritet me protesta në Kosovë

Bizneset e vogla të kryeqytetit dhe Federata Sindikale e Punëtorëve Teknik të Sektorit Privat të Kosovës me rastin e 1Majit, Ditës së Punëtorëve, do të protestojnë në Prishtinë. Nga ana tjetër Partia Socialdemokrate për këtë ditë organizon një aksion para Qeverisë së Kosovës.

Federata Sindikale e Punëtorëve Teknik të Sektorit Privat të Kosovës, nga ora 11:00 deri në orën 12:00, nga sheshi “Zahir Pajaziti”, deri te Teatri Kombëtar, do të protestojë për gjendjen e rënd të Punëtorëve të Sektorit Privat të Kosovës.

Bizneset e vogla do të protestojnë para objektit të Komunës së Prishtinës, duke filluar nga ora 09:00.

Sabudin Hasani, përfaqësues i shoqatës “bizneset e vogla”, i ka thënë KosovaPress-it se protesta do të mbahet kundër padrejtësisë dhe diskriminimit që po u bën komuna në shfrytëzimin e hapësirave publike.

Sipas tij, bizneset në këtë protestë po ashtu do të kërkojnë vazhdimin e lejeve për kioskat, pasi ata tash e një vit e gjysmë i kanë bërë kërkesë komunës por se ajo nuk ka përfunduar këtë proces.

1 Maji njihet si Dita Ndërkombëtare e Punës. Ky manifestim lindi nga lufta e punëtorëve për të kërkuar dhe siguruar të drejtat, liritë dhe kushtet e punës e të jetesës.

LEXONI GJITHASHTU:

• Denoncon avokati: Punonjësit nuk marrin dot leje sepse nuk iu paguhet
• Muça: Vetëm 5% e kompanive në Shqipëri respektojnë 100% kontratat e punës