Ndihmë fëmijëve ukrainas, Papa ndërmjetëson kthimin e të miturve të rrëmbyer në Rusi

Në rrugën e kthimit nga Hungaria, Papa Françesku, ka deklaruar se Vatikani po punon për një plan për kthimin në shtëpi të fëmijëve ukrainas të rrëmbyer në Rusi gjatë luftës.

Ati i shenjtë nuk dha shumë detaje, por nënvizoi se të dhënat e misionit do të publikohen më vonë gjatë muajit. Papa tha se Kisha ka lehtësuar edhe më parë shkëmbimin e të burgosurve.

“Selia e Shenjtë ka vepruar si ndërmjetëse në shkëmbimin e të burgosurve, përmes ambasadës. Negociatat kanë shkuar mirë dhe besoj se kështu do të shkojnë edhe këtë herë. Është diçka me rëndësi që Vatikani ka vullnetin ta bëjë, pasi është gjëja e duhur. Duhet të ndihmojmë pasi është një çështje njerëzore”, tha Papa.

Javën e kaluar, kryeministri ukrainas Denys Shmyhal u takua me Papa Françeskun dhe i kërkoi atij të ndihmonte në kthimin e fëmijëve ukrainas të rrëmbyer gjatë pushtimit rus.

Në mars, Gjykata Ndërkombëtare Penale lëshoi një urdhër-arrest për presidentin Putin dhe komisionerin rus për të miturit pikërisht për rrëmbimin e fëmijëve.

LEXONI GJITHASHTU:

• Papa nis vizitën treditore në Hungari
• Papa Françesku u jep grave të drejtën e votës në mbledhjen e peshkopëve