Nervozizmi i shqiptarit “fundos” trafikantët, kapet kamioni me kokainë në Itali

Karabinierët në Novara të Italisë kanë arrestuar një shtetas shqiptar dhe kolegun e tij rumun, pasi në kamionin që ata po udhëtonin është gjetur një sasi lënde narkotike.

Kamioni i cili drejtohej nga shtetasi rumun dhe pasagjer shtetasin shqiptar, mbante të fshehur në pjesën e pasme një sasi prej 5.7 kilogramë kokainë si dhe një sasi parash prej 3 mijë eurosh.

Mediat italiane raportojnë se gjatë kontrollit rutinor, policët vunë re nervozizëm tek shtetasi shqiptar, çka i shtyu të bënin një kontroll më të detajuar të mjetit.

Lënda narkotike dhe paratë u sekuestruan ndërkohë, që shqiptari dhe rumuni, u shoqëruan në paraburgim në Novara, duke pritur masën e sigurisë nga drejtësia italiane.

Policia po vijon punën për të identifikuar dhe personat e tjerë të përfshirë në këtë aktivitet kriminal.