Tenderi për pajisjet anti-COVID, Pampuri: Iu dha kompanisë që ofroi çmimin më të lartë, po grabiten qytetarët

Ish-deputetja e Partisë Demokratike, Orjola Pampuri ka denoncuar sot publikisht një tender ku Ministria e Shëndetësisë ka shpallur fituese kompaninë me vlerën më të lartë. Sipas Pampurit për blerjen e paisjeve mbrojtëse për mjeket, qeveria do të harxhojë 3 milionë euro, duke skualifikuar ofertat e tjera që ofronin të njëjtin shërbim me 1 milion euro.

Në një lidhje ‘live’ me Euronews Albania ish-deputetja tha se ky denincim është bërë nga PD prej tri ditësh dhe ende nuk ka një përgjigje as nga Ministria e Shëndetësisë, as nga Zyra e Prokurimit Publik dhe as nga kryeministri Rama.

E pyetur lidhur me emrin e kompanisë në fjalë që sipas PD ka fituar padrejtësisht një tender në një kohë që ofronte çmimin më të lartë për të njëjtin produkt, znj. Pampuri tha se PD nuk e ka këtë informacion. I rëndësishëm për t’u denoncuar sipas saj është fenomeni i shkeljes së ligjit në tenderë që më tej rëndojnë në xhepat e qytetarëve.

“Ne këtë informacion kemi dhe këtë kemi denoncuar. Kjo është shumë e rëndësishme dhe qytetarëve nuk u intereson emri, por pse një kompani që ofron më shumë fiton tenderin kur në kohë pandemie nuk duhen bërë shpenzime luksi.

Janë blerë disa pajisje mbrojtëse anti-COVID, mes të cilave edhe maska. PD ka denoncuar faktin se me kaq para mund të bliheshin shumë më tepër pajisje të tjera mbrojtëse”, tha ish-deputetja.