Qeveria propozon ristrukturimin e Shërbimit për Çështjet e Brendshme dhe Ankesat në Policinë e Shtetit

Ministria e Brendshme ka hedhur për konsultim një projekt-ligj, i cili parashikon riorganizimin e Shërbimit për Çështjet e Brendshme dhe Ankesat në Policinë e Shtetit.

Projekt-ligji parashikon ristrukturimin në një agjenci të re që do të quhet Agjencia e Mbikëqyrjes Policore, e cila do të jetë nën varësinë e drejtpërdrejtë të ministrit.

“Agjencia e Mbikëqyrjes Policore […]  ka si mision mbikëqyrjen e pavarur, objektive dhe transparente të punonjësve të policisë, strukturave ruajtëse të personaliteteve shtetërore dhe personelit të Akademisë së Sigurisë,” – thuhet në projekt-ligj.

Sipas qeverisë përmes këtij projekt-ligji do të sigurohet organizimi më i mirë i shërbimit të kontrollit dhe ankesave ndaj policisë.

Projekt-ligji ka të mirë-përcaktuar marrëdhëniet e Agjencisë me ministrin e Brendshëm.

Agjencia thuhet shprehimisht se nuk e informon ministrin për hetimet, identitetin apo informacionet e përftuar nga personat e penduar, apo bashkëpunëtorëve të drejtësisë, por vetëm “për ecurinë e hetimeve”.

Ministria thotë se me krijimin e kësaj agjencie, puna do të orientohet më shumë drejt “informacionit cilësor” dhe “veprimet pro-aktive me qëllim parandalimin dhe zbulimin e veprimtarisë korruptive dhe asaj të kundërligjshme në strukturat e policisë”.