PPE rezolutë për Shqipërinë, Basha kërkon ndihmën e BE-së për COVID-19

Partitë Popullore Europiane i kanë bërë thirrje qeverisë së Shqipërisë që të bëjë çdo përpjekje për të tejkaluar krizën kushtetuese dhe politike ku ndodhet vendi. Thirrja është  bërë përmes një rezolute të miratuar në Asamblenë Politike të PPE.

PPE vlerëson si jetike rëndësinë e zgjedhjeve të lira në përparimin në procesin e integrimit dhe vlerëson dakordësinë e 5-Qershorit, ndërsa dënon shkeljen e saj nga qeveria me ndryshime ligjore të njëanshme.

Asambleja Politike e PPE e zhvilluar online, nxit Kuvendin e Shqipërisë që t’i bindet dhe të zbatojë menjëherë opinionin e kërkuar nga Komisioni i Venecias për ndryshimet kushtetuese dhe ligjore lidhur me zgjedhjet e 25 prillit.

Në asamble mori pjesë dhe kreu i PD-së, Lulzim Basha ku fjalën e tij e ka përqendruar tek situata e rënduar shëndetësore në vend dhe mungesa e masave për të menaxhuar situatën nga ana e qeverisë.

Duke theksuar se, Shqipëria është vendi me numrin më të ulët të testimeve, mungesën e stafit mjekësor për banor, Basha ka kërkuar ndihmën e vendeve anëtare të BE, që janë pjesë e PPE, për të asistuar Shqipërinë me furnizimin me vaksina kundër COVID-19.

“Shqipëria ndodhet sot në krizë të thellë ekonomike, papunësia është rritur dhe shumica dërrmuese e qytetarëve nuk e përballojnë dot blerjen e medikamenteve anti-COVID, të cilat fatkeqësisht në Shqipëri, janë me çmime më të larta se në çdo vend tjetër.

Ndihma e vendeve tuaja me vaksina anti-COVID, në çfarëdo sasie që të jetë, është mëse e mirëpritur, dhe ne do t’ju jemi gjithmonë mirënjohës. Vendi im dhe qytetarët e mi, janë në një situatë tejet të vështirë, e cila sa vjen dhe po përkeqësohet. Prandaj, ju lutem na ndihmoni në këto kohë tejet të vështira”, është shprehur Basha.