Presidenti Biden në Japoni, do marrë pjesë në takimin e G7

Presidenti i Shteteve të Bashkuara Joe Biden ndodhet në Japoni, për të marrë pjesë në takimin e nivelit të lartë të grupit të shtatë vendeve më të industrializuara, Kanadasë, Francës, Gjermanisë, Italisë, Japonisë, Britanisë dhe Shteteve të Bashkuara.

Presidenti Biden u takua me kryeministrin e Japonisë Fumio Kishida, në Hiroshima, qyteti ku do të zhvillojë punimet takimi i nivelit të lartë të G7-ës, nga 19- 21 maj.

Kryeministri Kishida u tha gazetarëve pas takimit se kishte rënë dakord me presidentin Joe Biden për vazhdimin e sanksioneve ndaj Rusisë dhe për të mbështetur Ukrainën.

“Ramë dakord për të vazhduar sanksionet ndaj Rusisë dhe për të ofruar mbështetjen e fortë për Ukrainën”,-tha zoti Kishida.

Duke iu referuar takimit mes zotit Biden dhe zotit Kishida, Shtëpia e Bardhë njoftoi përmes një deklarate se dy zyrtarët diskutuan rrugët e forcimit të bashkëpunimit në fushën e mbrojtjes dhe gjetjen e mënyrave për t’iu përgjigjur trysnisë ekonomike të Pekinit.

“Do të vazhdojmë bashkëpunimin e ngushtë në një sërë çështjesh që lidhen me Kinën. Ramë dakord të punojmë bashkë në sfidat që përfshijnë Kinën”,-shtoi kryeministri japonez.

LEXONI GJITHASHTU:

• Presidentja e Moldavisë: Anëtarësimi në BE, mburojë kundër agresionit rus
• “Mbylle gojën”- Tensionet De Bruyne-Guardiola në ndeshjen Real-City (VIDEO)