Basha zotohet të kufizojë në vetëm dy mandate postin e kryeministrit

Kryetari i Partisë Demokratike, Lulzim Basha, u zotua me rastin e Ditës së Rinisë se nëse do t’i jepet mundësia e qeverisjes do ta kufizojë në vetëm dy mandate mundësinë për të drejtuar vendin, kjo me argumentin se “elitat duhen qarkulluar” dhe të rinjve u duhet dhënë më shumë hapësirë.

Zotimin e tij Basha e bëri në një fjalim virtual të organizuar nga Forumi Rinor i PD-së.

Ndërsa përmendi zanafillën e “Lëvizjes Studentore” si ngjarje historike dhe frymëzuese për të rrëzuar diktaturën, Basha këmbënguli se edhe sot 30 vite pas asaj dite, Shqipëria ka nevojë për kontributin e të rinjve.

Më tej Basha u ndal gjatë të kritikonte qeverinë e Kryeministrit Rama. Ai tha se premtimet e pambajtura në tetë vite “s’mund të mbahen dot as për 80 vite”. Thënë këtë ai drejtoi si pyetje retorike: “Pse duhet të kemi pushtetarë të përjetshëm?”.

“Kur kemi kaq shumë potenciale, përfshirë të rinj e të reja që kanë vizion të ri, sjellin një përqasje, mendësi, energji dhe qeverisje të re. Dy mandate janë të mjaftuesdhme për të dhënë kontribut të vlefshëm në krye të insticioneve shtetërore. Pas kësaj çdokush mund të vazhdojë të japë kontribut edhe në fusha të tjera […] Ndaj zotohem sot, se përmes parlamentit të ri apo edhe me referendum qytetar, unë do të bëj realitet kufizimin e mandatit të kryeministrit dhe ju vetë do të votoni për të qarkulluar elitat dhe për të pastruar ujin e ndenjur të politikës shqiptare,” – u shpreh Basha.

Teksa jemi rreth pesë muaj përpara zgjedhjeve parlamentare, shumica socialiste e drejtuar nga kryeministri Edi Rama do të kërkojë një mandat të tretë.

Aktualisht legjislacioni shqiptar nuk ka kufizime për mandatet që mund të mbajë një politikan si udhëheqës i vendit.

Deri më sot, në historinë e pluralizmit shqiptar, vetëm Edi Rama dhe Sali Berisha kanë fituar dy mandate radhazi.

Lexoni gjithashtu:

Sot Dita Kombëtare e Rinisë, 30 vite më parë studentët u ngritën për demokraci