Zbardhen vrasjet e bujshme, SPAK gjen autorët e atentateve ndaj Vajdin Lamajt dhe Klodian Saliut

Lajme të mëdha vijnë nga SPAK-u.

Prokuroria e Posaçme Kundër Krimit të Organizuar dhe Korrupsionit ka njoftuar se ka arritur të zbardh dy vrasje të bujshme të ndodhura 15 vite më pare  ku të  përfshirë kanë rezultuar personazhe të rëndësishëm të  botës së krimit.

Konkretisht bëhet fjalë për vrasjen e biznesmenit Vajdin Lamaj mbrëmjen e 27 shkurtit dhe ish-anëtarit të bandës së Durrësit, Klodian Saliu. Rihapja e hetimeve ka ardhur pas dëshmisë së një personi te penduar që aktualisht ndodhet pas hekurave.

Për ekzekutimin mafioz me eksploziv në ashensor ku mbeti i vrarë, Vajdin Lamaj dhe Artan Arsi prokuroria bën përgjegjës Emiljano Shullazin dhe Viktor Ymerin.

Ndërkaq për ngjarjen tjetër ku në autostradën Tiranë-Durrës, në Maminas në afërsi të fshatit Goxhaj ku u ekzekutua breshëri automatiku Klodian Saliu, SPAK ka lëshuar urdhër arreste për Lulzim Berishën, Plarent Dervishin, Indrit Taullaun, Luftar Reçin dhe Indrit Rusin.

Sipas organit të akuzës të gjashtë personazhet e botës së krimit kanë bashkëvepruar me njëri-tjetrin për të realizuar të dy atentatet që shkaktuan edhe 3 viktima.

Indrit Taullau u arrestua dy ditë më parë në Kosovë, ndërsa Viktor Ymeri dhe Indrit Rusi u  prangosën të martën nga policia. Ndërkohë në kërkim ndërkombëtar  janë shpallur Lulzim Berisha dhe Plarent Dervishi.

Ndaj këtyre personave tashmë janë ngritur disa akuza, si ajo e “Vrasjes me paramendim” kryer në bashkëpunim në formën e grupit të strukturuar kriminal, “Mbajtjes pa leje të armëve luftarake me pasoja të rënda”, “Grup i strukturuar kriminal” si dhe “Vrasjes në rrethana të tjera cilësuese”, kundër dy ose më shumë personave, të kryer në bashkëpunim në formën e grupit të strukturuar kriminal.