Kampione prej një dekade, Vllaznia e femrave në futboll fiton kampionatin e 10-të 

Tashmë ekipi i Vllaznisë së vajzave pas ecurisë spektakolare vitin e kaluar në Champions League ka shkruar historinë edhe në kampionatin shqiptar duke vendosur yllin e parë në fanelë.

Atë që nuk po e bën Vllaznia e meshkujve në futboll po e bën më së miri ekipi i vajzave të Shkodrës, ku në 10 vitet e fundit janë shpallur 10 herë kampion.

I fundit dhe më i rëndësishmi u finalizua mbrëmjen e së hënës me fitoren përballë Tiranës në “Loro Boriçi” me rezultatin e pastër 3-0. Pas rënies së bilbilit në stadium shpërtheu festa.

Për trajnerin Nikolin Leka emocionet janë të mëdha pasi është finalizim i një rrugëtimi shumë vjeçar.

Futbollistet protagoniste të suksesit u shprehen shumë të emocionuara por edhe shumë krenare për suksesin e arritur.

Meritë shumë të madhe për këtë sukses ka padyshim presidenti i ekipit Lazer Matija i cili besoi dhe investoi shumë ndër vite. Tashmë Matija ka një tjetër objektiv.

Në këto 10 vite ,Vllaznia ka bërë krenar një qytet të tërë por dhe  të gjithë vendin me përfaqësimin deri në fazën e grupeve të Champions League me ekipe si Chelsea, Real Madrid apo Paris SG.

Në 10 vite kampion Vllaznia ka një rekord absolut në rajon me rreth 1450 gola të shënuar dhe vetëm 40 të pësuar.

LEXONI GJITHASHTU:

• Vllaznia kërkon finalen e kupës, Egnatia një ‘makth’ për shkodranët
• Gjysmëfinalet e kupës | Vllaznia përballet me Egnatian, Tirana me Teutën