Korrupsioni në RMV, Nuri Bajrami: Jemi ende larg luftës së vërtetë

Në Ditën Ndërkombëtare të luftës kundër korrupsionit, Komisioni Shtetëror për Parandalimin e Korrupsionit në Maqedoninë e Veriut dha raport për punën e tyre gjatë këtij mandati. Në më pak se dy vite, Komisioni për Parandalimin e Korrupsionit ka ngritur 713 procedura për korrupsion, konflikt interesash, verifikimin e pronës së funksionarëve dhe shkelje gjatë procesit zgjedhor.

Komisioni vlerëson se po rritet besimi i shoqërisë në institucionet që luftojnë korrupsionin. Ndërkohë përfaqësues të Delegacionit të BE-së në RMV theksuan se për rritjen e efikasitetit të luftës ndaj korrupsionit duhet përfshirë aktivisht edhe shoqëria civile dhe opinioni. 

një raport rajonal lidhur me integritetin e qeverive në sektorin e mbrojtjes i publikuar nga Transparency International e kategorizon Maqedoninë e Veriut si vend me rrezik të moderuar nga korrupsioni.

Nuri Bajrami, anëtar i Komisionit për Anti-Korrupsionin thotë se për shkak të pandemisë raporti për vitin 2019 ende nuk është shqyrtuar nga Parlamenti i Maqedonisë së Veriut. Ai tha se, politika në RMV është e përfshirë dhe pjesë e korrupsionit.

“Në Maqedoninë e Veriut politika është e inkorporuar, është e zhytur e implikuar në të gjithë poret e shoqërisë”, tha ai.

Ndonëse ka pasur përpjekje për luftën kundër korrupsionit, z. Bajrami theksoi se shumë prej nismave nuk janë zbatuar në praktikë.

“Ajo që ka ndodhur me Prokurorinë Special është absurde. Të gjithë hartojnë programe në praktikë sillen me metoda të njëjta. Në raportin e KE për punë tonë kemi fituar pranimin e faktit se ne kemi bërë hapa progresive por jemi ende larg luftës së vërtetë kundër korrupsionit”, përfundoi ai.