Bestytnitë e Vitit të Ri, sa i zbatojnë dhe i besojnë Shqiptarët 

Në vende të ndryshme të botës, Viti i Ri pritet me rituale të ndryshme në mënyrë që të jetë më i mbarë dhe më i suksesshëm. Ka mjaft rituale interesante me të cilët popujt nëpër botë lënë metaforikisht pas krahëve vitin e vjetër.

Në Spanjë dhe në shumë vende të Amerikës Qendrore si në Venezuelë dhe në Kosta Rika, vendosen 12 kokrra rrushi në tavolinë, një për çdo muaj të vitit: është traditë të hash nga një kokërr çdo sekondë që paraprin mesnatën.

Në Japoni, në mesnatë, tempujt budistë u bien kambanave 108 herë, për të larguar 108 elementet të gjendjes mendore që i bëjnë njerëzit të sillen keq.

Në Itali e në shumë vende evropiane veshin të brendshme ngjyrë të kuqe si ritual fatsjellës. Por nuk është kudo kështu: në shumë vende të Amerikës Qendrore, ngjyra fatsjellëse është e verdha. 

Në plazhin Copacabana në Rio de Janeiro, më shumë se dy milionë njerëz mbërrijnë çdo vit të veshur në të bardha. Nëse ndodheni atje për të pritur Vitin e Ri, mund të hidheni shtatë herë mes valëve duke shprehur shtatë dëshira, të hani shtatë kokrra rrushi apo shtatë kokrra shege, si një dëshirë për mbarësi, siç e dikton tradita.

Në shumë kultura në vende të ndryshme të botës, nga Greqia në Meksikë e deri në Filipine, kush gjen monedhën e fshehur tek kulaçi, do të ketë shumë fat.

Në Austri, për drekën e Vitit të Ri është i obliguar mishi i derrit të pjekur, si simbol i lumturisë. Në Angli njerëzit formojnë një rreth me qirinj të kuq dhe hidhen në mes pa i fikur ato.

Në Kinë për 24 orë të gjitha thikat largohen nga shtëpia.

Edhe në Shqipëri shumë bestytni i kemi të dëgjuara nga gjyshet, disa të tjera i kemi huazuar nga vendet e tjera si hyrja në derën e shtëpisë patjetër me këmbën e djathtë, mbajtja e monedhave në portofol, që të kesh lekë përgjatë vitit të ri, tavolina e cila nuk duhet të ngrihet kur mbaron, por të lihet e shtruar, apo edhe veshja e rrobave të kuqe që të sjellë mbarësi.

Të pyetur nga Euronews Albania se sa i besojnë këto bestytni, pjesa më e madhe e tyre u shprehën se nuk i besojnë.