Plagosi me thikë 2 persona, arrestohet “Radari”. Çfarë i gjeti policia në banesë

Fatmir Jashari, personi i cili plagosi me thikë dy persona mesditën e kësaj të shtune në Sarandë, është arrestuar nga policia.

Policia bën me dije se gjatë kontrollit në banesën e Jasharit, u gjetën dhe sekuestruan një sasi lënde e dyshuar nitrat amoni, që përdoret si lëndë plasëse artizanale, 16 kapsolla detonatore dhe 3 fishekë luftarakë.

52 vjeçari akuzohet për veprat penale “Plagosja e rendë me dashje” dhe “Prodhimi dhe mbajtja pa leje e armëve luftarake dhe municionit”.

Jashari plagosi me thikë shtetasit Edmond Sulo 54 vjeç dhe Spiro Llambri 62 vjeç, të cilët ndodhen në spital, jashtë rrezikut për jetën.

Jashari është me profesion peshkatar dhe ka precedentë të mëparshëm penal, ku njihet në zonë dhe me nofkën “Radari”.

Në vitin 2000 ai është arrestuar në Korfuz pasi drejtonte një skaf me të cilin kryente trafik droge. Ai u dënua me 2 vite burg. Në 2009-tën Jashari u kap nga policia e Gjirokastrës me 50 kilogramë marijuanë, por u lirua pas disa muajsh. Gjatë kontrollit të banesës në atë kohë iu gjetën 3 armë zjarri automatike tip kallashnikov, 2 kilogramë tritol, 680 kapsolla detonatore, ku 50 copë ishin të montuara me fije teli, 50 metra fitil ndezës, 1500 fishekë model 56 (automatiku) dhe 6 krëhëra automatiku me fishekë.

LEXONI GJITHASHTU:

• Identifikohet autori i 2 plagosjeve, personazhi i rrezikshëm me nofkën “Radari”
• EMRI| Plagosje në Sarandë, qëllohet me thikë në kokë dhe brinjë një 54-vjeçar