Senati njeh fitoren e Biden, kreu i republikanëve uron presidentin e zgjedhur: Rezultati flet qartë

Kreu i grupit të republikanëve në Senatin amerikan, Mitch McConnell, theu heshtjen dhe uroi  presidentin e zgjedhur Joe Biden dhe zëvendësen e tij Kamala Harris për fitoren në zgjedhjet e 3 nëntorit, duke i dhënë fund heshtjes së gjatë mbi rezultatin e garës presidenciale.

Në reagimin e tij, McConnell njoftoi se njeh fitoren e demokratëve në kontestin elektoral për Shtëpinë e Bardhë, pas rezultatit të publikuar më herët nga Kolegji Elektoral.

“Sot dua të uroj presidentin e zgjedhur Joe Biden, i cili ka qenë një shërbëtor i përkushtuar i shtetit për shumë vite,” – deklaroi McConnell.

Ai theksoi se do të kishte dashur një rezultat ndryshe, por shtoi se, “tashmë të gjithë amerikanët mund të ndihen krenar që vendi ka për herë të parë një grua si zëvendës presidente”.

E ndonëse Kolegji Elektoral vulosi zgjedhjet e 3 nëntorit, presidenti Trump ende refuzon të pranojë humbjen duke bërë pretendime të pabazuara për mashtrim të votave.

Lexoni gjithashtu: 

Presidenti rus, Putin, uron Biden për fitoren në zgjedhje

Kolegji Elektoral ‘vulos’ zyrtarisht Joe Biden president të SHBA: Koha të kthejmë faqe, të bashkohemi