Berisha në Kuvend: Me dorëzimin e Asocacionit, Rama u bë avokat i Serbisë së Madhe

Ish-kryeministri Sali Berisha foli nga foltorja e parlamentit në lidhje me zhvillimet në veri të Kosovës.

Berisha theksoi se Kosova është një vend i pavarur dhe me qeveri legjitime, ndaj Shqipëria nuk duhet të përzihet në dialogun me Serbinë.

Ai theksoi se me propozimin e draftit të Asocacionit, kryeministri Rama u bë avokat i projektit të Beogradit për Serbinë e Madhe.

“Kosova është vend i pavarur me qeveri legjitime. Shqipëria nuk duhet të përzihet në dialog. Nëse përzihet qëndron në anën e Kosovës, në rastin e Ramës ai qëndron në anën e Vuçiç dhe nuk ka shqiptar që beson në qëllime të tjera përveçse për të ndihmuar me çdo kusht e çdo mënyrë padronin e tij.

Ky zotëri për arsye të cilat i di ai vetë pas vizitës në Serbi u bë një zëdhënës i neveritshëm, avokat i turpshëm i projekteve të Serbisë së Madhe.

Projekti i asociacionit ishte ndërhyrja më brutale në çështjet e brendshme të Kosovës, akt antishqiptar. E konsideroi Kosovën vend vasal. Anuloi takimin me qeverinë e Kosovën pasi ajo nuk pranoi të diskutojë draftin e marrë në sirtarin e Vuçiç.

Rama e bëri këtë jo vetëm si shërbim ndaj Beogradit, por sepse korriku po vjen, është në hetim për aferën e McGonigal. Tani është i gatshëm të kryejë çdo akt vetëm që të lehtësojë pozitën e tij të pashpresë.

1 muaj më parë dosja e McGonigal që kishte në përmbajtje ryshfetin për të shkrirë opozitën shqiptare është shkrirë me dosjen ruse”, tha Berisha.