Bursa europiane hap garën për borxhin 600 mln euro që kërkon Shqipëria

Bursa e Londrës ka listuar kërkesën e Shqipërisë për marrjen e borxhit 600 mln euro në tregjet ndërkombëtare. Sipas dokumentit, “Eurobondin” e radhës, është me afat maturimi 5-vjeçar dhe norme interesi  5.9%.

Qeveria shqiptare është pranë marrjes së borxhit  me vlerë 600 mln euro. Bursa e Londrës ka konfirmuar dhe listuar kërkesën e vendit tonë, për “Eurobondin” e radhës, me afat maturimi 5-vjeçar, dhe një normë interesi  5.9%. 

Në dokumentin me 194 faqe që shoqëron kërkesën për emetimin e borxhit, përfshihet dhe një analizë mjaft e gjerë mbi Shqipërinë dhe ekonominë e vendit tonë, me të cilën investitorët duhet të vlerësojnë a ka rrezik ose jo t`i japin borxh me kushtet e sotme.

Pas rrezikut të inflacionit dhe paqëndrueshmërisë në tregun energjetik, dokumenti vlerëson si rreziqe edhe ekonominë informale, korrupsionin, sistemin gjyqësor dhe statistikat që nxjerr qeveria. Për këto të fundit, investitorët këshillohet t`i marrin me rezerva, së bashku me riskun që buron nga pasaktësia e tyre.

Fillimisht qeveria shqiptare planifikoi një hua 500 milionë euro për këtë vit, por zhvlerësimi i monedhës europiane ka nxitur autoritetet të kërkojnë edhe 100 milionë euro më të lartë.  Pjesa më e madhe e kësaj shume pritet të shkojë për të financuar borxhet e mëparshme,  ndërsa në historikun e kërkesave 13-vjeçare për eurobond, kjo është dalja e 6-të në tregjet ndërkombëtare. 

LEXONI GJITHASHTU:

• Çmimi i naftës në ulet në bursa, Shqipëria në listën e 20 vendeve më të shtrenjta
• Bursat e ekselencës, studentët duhet të punojnë 3 vite në administratë