Vota e emigrantëve në zgjedhjet e 25 prillit, KQZ-ja bën hapin e parë

Komisioni Qendror i Zgjedhjeve ka kërkuar nga Drejtoria e Përgjithshme e Gjendjes Civile t’i vërë në dispozicion numrin e saktë të shtetasve shqiptarë, të cilët aktualisht jetojnë jashtë vendit.

Ky hap i KQZ-së vjen në kuadër të projektit për të bërë të mundur që shqiptarët që jetojnë jashtë Shqipërisë, të marrin pjesë dhe të votojnë në zgjedhjet parlamentare të 25 prillit.

Kërkesa zyrtare, e cila mban datën 23 dhjetor është firmosur nga kreu i Komisionit Qendror të Zgjedhjeve, Ilirjan Celibashi.

Në letrën drejtuar Drejtorisë së Përgjithshme të Gjendjes Civile, të cilën Euronews Albania e disponon, z. Celibashi kërkon t’i vihet në dispozicion numri i saktë i emigrantëve shqiptarë, të ndarë sipas qarqeve, dhe njëkohësisht adresën e vendbanimit të përhershëm që ata kanë regjistruar në vendet ku jetojnë.

Vota emigrantëve, ka qenë një ndër pikat në të cilën janë pajtuar palët në tryezën e Këshillit Politik, e përfshirë në marrëveshjen e “5 qershorit”.

Por, pavarësisht këtij konsensusi të arritur ndërmjet palëve, tashmë në dorë i është lënë Komisionit Qendror të Zgjedhjeve për të bërë të mundur implementimin e këtij projekti, aq shumë të kërkuar edhe nga vetë emigrantët.

Lexoni gjithashtu: 

Si do votojnë emigrantët? Majko: Nuk do të ketë nevojë për adresën, regjistrohen në KQZ